來喲！緊來緊看，慢來你就無底看。瑞穗國小，高手一大堆，高明的老師閣較是一大叠，若海湧若懸山仝款，學校內有本土師、外國師、音樂師、體育師、智慧師……，上厲害的攏佇遮啦！教冊學習的步數有千萬步，撇步不驚你不學，只驚你學袂落。

　　今仔日阮欲介紹的是溫柔體貼，美麗大方的英語老師－－淑靜老師，嘛是瑞穗國小的教務主任，伊定定𤆬著規班小朋友佮日本學校彼爿的老師佮囝仔，佇網路頂用「英格麗遜」，啦咧佮人討論交朋友，不是佇咧畫虎爛，是認真做國際的交流！這陣的囝仔攏會佇進前做海報攢傢私，用心準備，這規个過程有哇精彩，若是有看過的是通人攏呵咾。另外，帶領音樂、體育老師，推動雙語教育，予上音樂、體育課的小朋友會當講華語，嘛訓練聽英語、講英語，學著真濟英文，予瑞穗國小的囝仔英文的能力提高，正港是「講英文嘛會通」，逐家是功夫盡展，無咧臭彈！

　　閣年佮校長同齊利用各種資源，請外師來上課佮指導老師專用、專業的語詞，絕對袂佇上雙語音樂、體育課時漏氣。現此時瑞穗的囝仔佮老師講英文講甲削削叫，足輪轉矣！嘛袂驚佮外國人講英語，直接交流是蓋厲害的。

　　若是上班時間佇辦公室找無伊，看袂著伊，不是伊請假去休睏，定定是伊請公假去開會抑是參加講習，佮其他的長官老師交流，提高家己的能力。問伊為什麼愛按呢拼命認真咧？淑靜主任伊會講：「做老師的攏知影，學語言佮任何學習仝款，環境會影響一切，佇環境內佈置一切，不管是會當振動，袂振動，耳孔聽得到，目睭仁看得到，只要會當予瑞穗的囝仔學會曉英文，平常時定定聽英語，講英文，家己閣較辛苦，這一切攏嘛是有價值的。」

　　瑞穗的囝仔是不是遐爾仔有才調？淑靜主任伊是不是按呢咧？歡迎逐家隨時來瑞穗鑑定喔！